Friday, January 14, 2011

તારી આભે ચઢેલી ઢાલમાં લબડતી ફૂદ્દી મારી હતી....

ભટકાવ્યું માથું ભિંત સમજી એ ભિંત નહીં પણ બારી હતી,
પછી તો હાથના હલેસા અને ભીની હવાની સવારી હતી.

દીવાદાંડીની જેમ ફરતી નજર એ નાજુક અદા તારી હતી,
તારી આંખના ઇશારે ચકરાવે ચડી એ પથારી મારી હતી.

તારી આભે ચઢેલી ઢાલમાં લબડતી ફૂદ્દી મારી હતી,
બદામ સમજીને અમે ખાતા રહ્યા એ સીંગ ખારી હતી!

બંધ લિફાફામાં મોકલી હતી એ ખુશ્બૂ ભરી ગઝલ મારી હતી,
ટપાલની રસિદ સમ દાદમાં મળેલી નવી ચંપલ તારી હતી.

'બધિરે' તો ખુદાથી બસ શોખ નજર જ માગી હતી,
સુહાગરાતે ઉઠાવ્યો ઘુંઘટ તો બેય આંખ ફાંગી હતી.
--
'બધિર' અમદાવાદી

Wednesday, January 5, 2011

ડુંગળી દૂરથી રળિયામણી!

શાલીં ગ્રામ એક કોર મુકાશે,
મહામુલા ડુંગળીબેન પૂજાશે.

મણ, કિલોના વજન ભુલાશે,
ડુંગળી તોલાના ભાવે વેચાશે.

કાંદાની ફોરમ પણ વખણાશે,
તહેવારે એના અત્તરો છંટાશે.

દર્શન  એના  દુર્લભ જો  થાશે,
શાકમાં ડુંગળીના ફોટા નંખાશે!

ડુંગળી વસાવવા લોનો અપાશે,
મણ કાંદાનો ધણી પાચમાં પૂછાશે.
--
'બધિર' અમદાવાદી